اب اپنی ذات سے بھی جدا ہو گیا ہوں میں
میں سوچنے لگا ہوں کہ کیا ہو گیا ہوں
الجھا ہوں زندگی کے مسائل میں آجکل
کچھ لوگ سوچتے ہیں خفا ہو گیا ہوں میں
میں زہر ہوں یہ بات بتائی تھی آپ نے
اب کیسے کیا ہوا کہ دوا ہو گیا ہوں میں
الزام آئینوں پہ لگانا فضول ہے
میں جانتا ہوں سچ میں برا ہو گیا ہوں میں
سب کر رہے تھے میری حمایت اسی لئے
خود کی مخالفت میں کھڑا ہو گیا ہوں میں
انعام عازمی
زندگی درد کا سفر ہے یار
ہر کوئی اس سے بے خبر ہے یار
اک طرف زخم ہیں حقیقت کے
اک طرف خواب کا نگر ہے یار
خود سے بیزار ہو گیا ہوں میں
جانے کس بات کا اثر ہے یار
مجھکو اس سے نہیں کوئی مطلب
بولتا ہوں سدا۔مگر ہے یار
جانے کیوں مجھکو لیسا لگتا ہے
گھر کے اندر بھی ایک گھر ہے یار
وہ جو سب پہ یقین کرتا ہے
آدمی ہے کہ جانور ہے یار
انعام
نہ راستہ ہے نہ منزل نہ ہم سفر کوئی
یہاں سے اٹھ کے بھلا جاے اب کدھر کوئی
اسی امید پہ شب بھر چراغ جلتا رہا
ضرور لوٹ کے آئے گا پھر ادھر کوئی
پتا چلے گا اسے, ہو کے بھی نہیں ہوں میں
مجھے قریب سے دیکھے یہاں اگر کوئی
دیار خواب میں پھر سے تری صدا سن کر
تری تلاش میں بھٹکا ہے رات بھر کوئی
کسی مقام پر اے میری زندگی تجھ سے
تو کیا کرے گی مجھے چھین لے اگر کوئی
انعام
سب لوگ جی رہے ہیں یہاں بے دلی سے کیوں
بیزار ہو گئے ہیں سبھی زندگی سے کیوں
اے میر کارواں ہمیں اتنا تو اب بتا
ہم دور ہو رہے ہر اک آدمی سے کیوں
ہے منصفین وقت کا ہر فیصلہ غلط
آواز آ رہی ہے یہی ہر گلی سے کیوں
ویسے تو نا امید ہوئے ہیں سبھی سے ہم
لیکن مجھے گلہ ہے تو بس آپ ہی سے کیوں
تم تو سوچتے بہت ہو ذرا یہ بھی سوچنا
خطرہ ہے میری عقل کو اب آگہی سے کیوں
انعام
ﺭﻧﺞ ﻭ ﻏﻢ ﮐﻮ ﺑﺤﺎﻝ ﮐﺮ ﺭﮨﮯ ﮨﯿﮟ
ﺁﺝ ﮐﻞ ﮨﻢ ﮐﻤﺎﻝ ﮐﺮ ﺭﮨﮯ ﮨﯿﮟ
ﺫﺍﺕ ﮐﻮ ﺍﭘﻨﯽ ﺭﺍﺋﯿﮕﺎﮞ ﮐﺮﮐﮯ
ﮐﺎﻡ ﮨﻢ ﺑﮯ ﻣﺜﺎﻝ ﮐﺮ ﺭﮨﮯ ﮨﯿﮟ
ﺑﺎﺕ ﺣﯿﺮﺍﻥ ﮐﻦ ﺗﻮ ﮨﮯ ﻟﯿﮑﻦ
ﺍﺏ ﮨﻢ ﺍﭘﻨﺎ ﺧﯿﺎﻝ ﮐﺮ ﺭﮨﮯ ﮨﯿﮟ
ﺟﺐ ﮨﯿﮟ ﺳﺎﺭﮮ ﺟﻮﺍﺏ ﺑﮯ ﻣﻌﻨﯽ
ﺁﭖ ﺑﯿﺠﺎ ﺳﻮﺍﻝ ﮐﺮ ﺭﮨﮯ ﮨﯿﮟ
ﮐﺮ ﮐﮯ ﺍﭘﻨﯽ ﻣﺨﺎﻟﻔﺖ ﮨﻢ ﺑﮭﯽ
ﮐﭽﮫ ﺩﻧﻮﮞ ﺳﮯ ﮐﻤﺎﻝ ﮐﺮ ﺭﮨﮯ ﮨﯿﮟ
ﺁﭖ ﮨﯿﮟ ﺯﻧﺪﮔﯽ ﻣﮕﺮ ﺍﺏ ﺁﭖ
ﻣﯿﺮﺍ ﺟﯿﻨﺎ ﻣﺤﺎﻝ ﮐﺮ ﺭﮨﮯ ﮨﯿﮟ
ﮐﯿﺎ ﮐﮩﺎ ﺗﮭﺎ ؟ ﺑﭽﮭﮍ ﮐﮯ ﺟﯽ ﻟﯿﻨﮕﮯ
ﺁﭖ ﺗﻮ ﺍﺏ ﻣﻼﻝ ﮐﺮ ﺭﮨﮯ ﮨﯿﮟ
ﺍﻧﻌﺎﻡ
صحراؤں کی جو پیاس تھے وہ لوگ کیا ہوئے
جتنے وفا شناس تھے وہ لوگ کیا ہوئے
یہ کس مقام پر مجھے لے آئی زندگی
جو میرے آس پاس تھے وہ لوگ کیا ہوئے
اب قہقہوں سے گونج رہا ہے تمہارا شہر
وہ جو بہت اداس تھے وہ لوگ کیا ہوئے
ہم سے تو نا امید ہے ہر شخص اب مگر
وہ جو امید و آس تھے وہ لوگ کیا ہوئے
بانوئے شہر جسم ذرا یہ بتا مجھے
جو درر کی لباس تھے وہ لوگ کیا ہئے
عنوان داستان کا میں تھا ابھی بھی ہوں
جو لوگ اقتباس تھے وہ لوگ کیا ہوئے
ویسے تو نا امید ہوئے ہیں سبھی سے ہم
جو آخری قیاس تھے وہ لوگ کیا ہوئے
انعام عازمی
بس خنجر ہی خنجر دیکھنا پڑتا ہے
اکثر ایسا منظر دیکھنا پڑتا ہے
جب چہروں کے رنگ بدلنے لگتے ہیں
تب چہروں کے اندر دیکھنا پڑتا ہے
قسمت میں وہ لمحیں بھی ہوتے ہیں جب
آئینہ بھی ڈر کر دیکھنا پڑتا ہے
بڑھ جاتے ہیں اپنی حد سے زیادہ جو
سب کچھ ان کو جھک کر دیکھنا پڑتا ہے
دل وہ گھر ہے جس میں جانے سے پہلے
باہر رہکر اندر دیکھنا پڑتا ہے
جو دکھتا ہے ویسا ہوتا ہے لیکن
کچھ منظر کو ہٹ کر دیکھنا پڑتا ہے
