فکر و آہنگ جدا کیف عظیم آبادی
کوئی تجھ سا نہ ہوا کیف عظیم آبادی
مثل قطرہ تھے ترے سامنے سب اہل ادب
تم تھے گھنگھور گھٹا کیف عظیم آبادی
تم سے آباد تھی ہر شعر و سخن کی محفل
تھے سبھی تم پہ فدا کیف عظیم آبادی
تیرے جانے سے ادب میں جو ہوئی تھی پیدا
پر نہ ہو پائی خلا کیف عظیم آبادی
چیخ کر اب بھی سر شام بلاتی ہے تمہیں
کتنی مایوس صدا کیف عظیم آبادی
سر نگوں ہو کے چلو تعزیت پیش کریں
ہوگئے ہم سے جدا کیف عظیم آبادی
انعام
سنو اے نیک دل لڑکی
تم اکثر پوچھتی ہو نا
محبت مجھ سے کرنے کی وجہ کیا ہے؟
سنو! تم کو بتا تا ہوں
محبت تم سے کرنے کی اگر کوئی وجہ ہوتی
تو میں تم کو بتا دیتا
مجھے تم سے محبت ہے
مگر کیوں ہے ؟
مجھے خود بھی نہیں معلوم
سنو اے نیک دل لڑکی
پڑھا ہوگا کہیں تم نے
سنا ہوگا کبھی تم نے
"محبت دو دلوں کے درمیاں پاکیزہ رشتہ ہے"
سنو لڑکی
تمہارے اور میرے درمیاں جو پاک رشتہ ہے
مجھے لگتا ہے یہ رشتہ
جہاں آباد ہونے سے بہت پہلے
زمیں ایجاد ہونے سے بہت پہلے
خدا نے جب
تمہارے اور میرے روح کی تخلیق کی ہوگی
ہماری قسمتیں لکھی گئی ہونگی
سنو لڑکی!
اسی قسمت کے پنے میں
فرشتوں نے
ہمارے درمیاں اک ربط باہم بھی لکھا ہوگا
ہمارے درمیاں اک پاک رشتہ بھی لکھا ہوگا
مگر اس کی وجہ لکھی نہیں ہوگی
بتاؤ پھر ؟
تمہیں کیسے بتاؤں میں؟
محبت تم سے کرنے کی وجہ کیا ہے
اگر کوئی وجہ ہوتی
بتا دیتا
انعام
یوں عہد بے اماں ٹھہرا ہوا ہے
کہ جیسے دو جہاں ٹھہرا ہوا ہے
کہانی میری جس پے منحصر ہے
وہی جانے کہاں ٹھہرا ہوا ہے
اسی امید پر کوئی سنے گا
ابھی تک بے زباں ٹھہرا ہوا ہے
بلندی کو ہے پستی کی ضرورت
زمیں پر آسماں ٹھہرا ہوا ہے
ٹھہرنا جس کی فطرت میں نہیں تھا
وہ مجھ میں نا گہاں ٹھہرا ہوا ہے
جو رہبر تھا کہیں وہ کھو گیا ہے
تبھی تو کارواں ٹھہرا ہوا ہے
چلو انعام چلتے ہیں یہاں سے
جہاں وہ جان جاں ٹھہرا ہوا ہے
تم کیا جانو کیا ہوتا ہے
جب کوئی تنہا ہوتا ہے
کھو جاتی ہے اس میں دنیا
جس کا دل دریا ہوتا ہے
خوابوں کی ہے بات نرالی
جو چاہو ویسا ہوتا ہے
میری باتیں کرتا ہے وہ???
کیا اب بھی ایسا ہوتا ہے
خود میں یوں کھویا رہتا ہوں
جیسے اک بچا ہوتا ہے
میں روشن ہوں غیر کی خاطر
جیسے ایک دیا ہوتا ہے
لگتا ہے وہ بالکل ویسا
جیسا اک سپنا ہوتا ہے
ہر چہرے کے اندر یارو
ایک نیا چہرا ہوتا ہے
جو کرتا ہے سچی باتیں
وہ بالکل اپنا ہوتا ہے
میں نے اکثر دیکھا ہے یہ
جو چاہو الٹا ہوتا ہے
سب کو مر جانا ہے اک دن
ہر وعدہ جھوٹا ہوتا ہے
ناممکن ہو جس کو پانا
وہ کتنا اچھا ہوتا ہے
عشق ہوا ہے پھر سے مجھ کو
دیکھو پھر کیا کیا ہوتا ہے
انعام عازمی
ایک مدت سے ہے یہ دل ناشاد
کوئی آتا رہا ہے اکثر یاد
ایک تعبیر ہو گئی پوری
یعنی اک خواب ہو گیا برباد
اے خدا ہار مان لی میں نے
اب دعا ہے نہ ہے کوئی فریاد
کوئی ویران کر گیا ایسے
پھر یہ بستی نہیں ہوئی آباد
یہ جو دنیا ہے قید خانہ ہے
جس میں پھرتا ہر کوئی آزاد
عشق ہے درد کی وجہ صاحب
یعنی غم عشق کی ہے اک ایجاد
داستاں ختم ہو گئی,شیریں!!
مر گیا آج آپ کا فرہاد
انعام
میرے فون میں اک ایسا نمبر بھی ہے
جس سے پہلے روزانہ
شام کا سورج ڈھلتے ہی کال آتا تھا
پچھلے چند مہینوں سے
اس نمبر سے ایک بھی کال نہیں آیا
اور اب آئے گا بھی نہیں
میں شام کو اپنے کالج سے
جب لوج میں اپنے آتا ہوں
میں گھنٹوں اس نمبر کو
یوں ہی دیکھتا رہتا ہوں
شاید مجھکو لگتا ہے
اس نمبر سےشاید پھر
کوئی کال آئیگا
اک آواز سنائی دے گی
بیٹا! بولو کیسے ہو ؟
کوئی دقت ہے بیٹا؟ طبیعت کیسی رہتی ہے؟
کھانا ٹھیک سے کھاتے ہو؟
چھٹی میں گھر آ جانا
لیکن اب اس نمبر سے
کوئی کال نہیں آتا
وہ نمبر "ابو جان" کا ہے
روٹھ کے جو اس دنیا سے
تنہا ہم کو چھوڑ گئے
وہ جو اک حقیقت تھا خواب بن گیا ہے کیا
زندگی میں پھر کوئی حادثہ ہوا ہے کیا
شہر کی فضاؤں میں یہ اداسیاں کیسی
اسکی یاد میں ابتک شہر رو رہا ہے کیا
آجکل میں خود سے بھی دور دور رہتا ہوں
زندگی کا ہر قصہ ختم ہو رہا ہے کیا
سارے خواب آنکھوں سے ہو کے آ گئے باہر
کچھ سمجھ نہیں آتا۔جانے ماجرا ہے کیا
اک عجیب بے چینی میرے دل میں رہتی ہے
وقت کی ہتھیلی پر حادثہ لکھا ہے کیا
شہر میں کہیں سے بھی اب صدا نہیں آتی
میرا چاہنے والا کوچ کر گیا ہے کیا
آتے جاتے چہروں کو ایسے دیکھتے کیوں ہو
کوئی بے طرح پھر سے یاد آ رہا ہے کیا
کب تلک رہوگے تم انتظار میں اسکے
جا کے اپنی دنیا میں کوئی لوٹتا ہے کیا
کیوں کلام میں تیرے سوز و ساز ہے انعام
درد کی حدوں کو تو پار کر گیا ہے کیا
انعام عازمی
