مجھ سے اک شخص پھر خفا ہوا ہے
میں نہیں جانتا کہ کیا ہوا ہے
اپنے اندر نہیں ہوں میں لیکن
مجھ میں اب تک کوئی رکا ہوا ہے
جب میں ساری سزائیں کاٹ چکا
تب مرے حق میں فیصلہ ہوا ہے
شاخ سے اڑ گئے پرندے کیا
کیوں درختوں کا منہ بنا ہوا ہے
ایک میں ہوں مرا سوا مجھ میں
دوسرا کون آ گیا ہوا ہے
یہ محلہ بھی تھا کبھی آباد
دل کی دیوار پر لکھا ہوا ہے
آ رہی ہے صدائیں چیخنے کی
مجھ میں پھر کوئی حادثہ ہوا
کیا کہا عشق ہو گیا ہے تمہیں
جو ہوا ہے بہت برا ہوا ہے
تمنا جس کی تھی ہم کو اسے پانا ضروری تھا
محبت میں حدوں کو پار کر جانا ضروری تھا
دیا امید کا روشن تھا میرے دل کے آنگن میں
مخالف تھی ہوا یادوں کی گھبرانا ضروری تھا
تمہاری یاد میں کوئی بہت ٹوٹا بہت بکھرا
تمہارا لوٹ کر اے جان جاں آنا ضروری تھا
کہانی ایک ایسے موڑ پر آکر رکی اپنی
ہمیں ہنستے ہوئے اس سے بچھڑ جانا ضروری تھا
ضرورت کیا تھی شمع پر بھلا یوں جان دینے کی
کہا ہنستے ہوئے سب سے یہ پروانہ, ضروری تھا
عشق کو ذات کا عنوان نہیں کر سکتا
روح کو اور پریشان نہیں کر سکتا
پیار میں اس نے وہی شرط رکھی ہے یارو
جس کو پورا کوئی انسان نہیں کر سکتا
مجھکو چہرے پہ لکھا پڑھنا نہیں آتا ہے
میں کسی شخص کی پہچان نہیں کر سکتا
یاد ماضی اگر آتی ہے یہی سوچتا ہوں
یار اتنا برا بھگوان نہیں کر سکتا
دل کی اب بات سمجھنی ہے نہ سمجھانی ہے
عقل کو اور میں حیران نہیں کر سکتا
اپنے راجہ کو بچانے کیلئے منتری دوں؟؟؟
میں تو پیادہ بھی بلیدان نہیں کر سکتا
یار میں تجھکو تسلی نہیں دے سکتا ہوں
تیری مشکل کو جب آسان نہیں کر سکتا
یاد کے گہرے سمندر کو ابھی پار کروں؟
تیز ہے وقت کا طوفان,نہیں کر سکتا
تجھکو جانے کی اجازت نہیں دے سکتا ہوں
اپنی بستی کو میں ویران نہیں کر سکتا
رات کے بارہ بجے کال کروں میں تم کو؟؟
نیند پیاری ہے مری جان,نہیں کر سکتا
مجھ کو دنیا میں اتارا گیا ہے اس کے لئے
میں کسی اور طرف دھیان نہیں کر سکتا
منزل ہوں,راستہ ہوں نہیں جانتا ہوں میں
اے میرے دوست کیا ہوں نہیں جانتا ہوں میں
ہے دل مرا اداس مری آنکھ اشک بار
کس غم میں مبتلا ہوں نہیں جانتا ہوں میں
میرے خیال و خواب میں رہتا ہے کون اب
میں کس کو سوچتا نہیں جانتا ہوں میں
مقتل سے آ رہی ہے صدا میرے نام کی
کیوں قتل ہو رہا ہوں نہیں جانتا ہوں میں
ٹکڑا رہا ہوں یادوں کے پتھر سے بار بار
کس سمت آ گیا ہوں نہیں جانتا ہوں میں
سب نا امید ہوکے ترے شہر سے گئے
میں کس لئے رکا ہوں نہیں جانتا ہوں میں
یہ کون مجھکو رائیگاں کرنے کو ہے بضد
میں کس کو مل گیا ہوں نہیں جانتا ہوں میں
انعام عازمی
بستیاں چھوڑ کے صحرا میں جو آئے ہوئے ہیں
زندگی تیرے ہی یہ لوگ ستائے ہوئے ہیں
جانے والے کبھی واپس نہیں آتے پیارے
لوگ پاگل ہیں جو امید لگائے ہوئے ہیں
جو دیا تم جلایا تھا دیار دل میں
ہم اسے اب بھی ہواؤں سے بچائے ہوئے ہیں
یہ الگ بات ہے تعبیر نہیں ہے ممکن
ہم بھی آنکھوں میں کئی خواب سجائے ہوئے ہیں
ہر طرف شہر میں چھائی ہے گھٹا یادوں کی
بارش غم میں سبھی لوگ نہائے ہوئے ہیں
اب بھی وہ شخص ہمیں یاد بہت آتا ہے
ویسے ماضی کی ہر اک چیز بھلائے ہوئے ہیں
میں نے سوچا تھا محبت سے ملیں گے ہم لوگ
آپ تو جنگ کا ماحول بنائے ہوئے ہیں
انعام عازمی
غزل
گھٹا جب رنج کی چھائے تو واپس لوٹ آنا تم
تمہیں جب چین نہ آئے تو واپس لوٹ آنا تم
میں تم سے ضد نہیں کرتا کہ واپس لوٹنا ہوگا
تمہارا دل اگر چاہے تو واپس لوٹ آنا تم
غموں کی دھوپ میں ہر دم تمہارا ساتھ دینگے ہم
سہانی شام ڈھل جائے تو واپس لوٹ آنا تم
سنو سورج محبت کا کبھی ڈھلنے لگے ,یا پھر
بڑھیں جب درد کے سائے تو واپس لوٹ آنا تم
ابھی آباد ہے گلشن تمہارا خوش رہو جاناں
اگر ویران ہو جائے تو واپس لوٹ آنا تم
اداسی اک سمندر ہے سنو تم کو اگر اس کے
کنارے پر کوئی لائے تو واپس لوٹ آنا تم
مبارک ہو نیا کردار جان من تمہیں لیکن
کہانی ختم ہو جائے تو واپس لوٹ آنا تم
انعام عازمی
سنو بابا
تمہیں معلوم ہی ہوگا
کہ پھرسے عید آئی ہے
میں بچوں کی طرح تم سے بہت کچھ مانگنے والا نہیں بابا
مرے بابا
مجھے عیدی نہیں لینی
نئے کپڑوں کی خواہش بھی نہیں مجھکو
مگر بابا
تمہیں تو یاد ہوگا نا
کہ جب بھی عید آتی تھی
تم اپنے ہاتھ سے ہم تینوں بھائی کو سدا خوشبو لگاتے تھے
مرے بابا
مجھے خوشبو لگا دونا
مرے بابا
کوئی جب اپنے بابا سے نئے کپڑے سلا دینے کو کہتا ہے
تمہاری یاد آتی ہے
کوئی جب اپنے بابا سے یہ کہتا ہے میں عیدی اتنے پیسوں سے ذرا بھی کم نہیں لوں گا
تمہاری یاد آتی ہے
مرے بابا
کسی بیٹے کو جب بھی باپ کی انگلی کو تھامے عید گاہ جاتے ہوئے میں دیکھتا ہوں تو
تمہاری یاد آتی ہے
کوئی جب اپنے بیٹوں کے سروں پر ہاتھا رکھ کر کامرانی کی دعائیں دینے لگتا ہے
تمہاری یاد آتی ہے
سنو بابا
اگر ممکن ہو واپس لوٹ آؤ نا
تمہیں معلوم ہی ہوگا
کہ پھرسے عید آئی ہے
انعام عازمی
