غزل

جو چلا آتا ہے خوابوں کی طرفداری کو
اس نے دیکھا ہی نہیں عالم بیزاری کو

پیرہن چاک نہ ہو جائے مرے خوابوں کا
کوئی تبدیل کرے رسم عزاداری کو

چارہ گر جب تجھے احساس نہیں ہے تو پھر
کون سمجھے بھلا بیمار کی بیماری کو

میں نے سوچا تھا جو بکنے سے بچا لیں گے مجھے
دوڑ کر آئے  وہی میری خریداری کو

عالم خواب میں ہے جس کی حکومت یارو
وہ سمجھتا ہے بغاوت مری بیداری کو

دل کے صحرا کو سمندر سے بچا لے مولیٰ
اس قدر سہل نہ کر تو مری دشواری کو

کتنے بھولے ہیں تری بزم میں بیٹھے ہوئے لوگ
سچ سمجھتے ہیں سبھی تیری اداکاری کو

غزل

اے محبت تو مجھے درد جدائی نہیں دے
اپنے زندان میں رکھ مجھ کو رہائی نہیں دے

میں اگر دیکھنا چاہوں بھی تمارے سوا کچھ
بس اندھیرا ہو مجھے کچھ بھی دکھائی نہیں دے

یوں نہ ہو عشق کا دستور معطل ہو جائے
میرے محبوب مرے حق میں گواہی نہیں دے

لب اگر چاہیں غم عشق بیاں کرنے کو
شور اتنا ہو مجھے کچھ بھی سنائی نہیں دے

دل کو  آرام کسی طور نہیں ملنا ہے
درد بڑھنے دے مرے دوست دوائی نہیں دے

چل تو سکتا ہوں ترے ساتھ مگر ڈر ہے یہی
یہ سفر پھر سے مجھے آبلہ پائی نہیں دے

غزل

ہم درختوں کو اگر جڑ سے گرانے لگ  جائیں
ان پرندوں کے تو پھر ہوش ٹھکانے لگ جائیں

ہم سفر تو ہی بتا کیسا لگے گا تجھ کو
ہم بچھڑنے پہ اگر جشن مانے لگ جائیں

یہ بھی ہو سکتا ہے چپ چاپ تماشہ دیکھیں
یا سر بزم جنوں رقص دکھانے لگ جائیں

راہ لے ہمیں چھوڑ دے اے مست خرام
یوں نہ ہو ہم تجھے صحرا میں پھرانے لگ جائیں

یہ بھی ممکن ہے پلٹ کر نہیں دیکھیں تجھ کو
یہ بھی ممکن ہے تجھے دل میں بسانے لگ جائیں

یہ بھی ممکن ہے کہ خاموشی زباں بن جائے
یہ بھی ممکن ہے ہم شور مچانے لگ جائیں

یہ بھی ممکن ہے کہ ہم تجھ کو گوارا نہ کریں
یہ بھی ممکن ہوں ترا ناز اٹھانے لگ جائیں

یہ بھی ہو سکتا ہے ہم تیری کہانی سن لیں
یہ بھی ممکن ہے ہے تمہیں شعر سنانے لگ جائیں

غزل

لایے تھے عشق پر ہم  ایمان اس گلی میں
یعنی کئے تھے اپنا نقصان اس گلی میں

جینا نہیں ہے یارو آسان اس گلی میں
ہوتی ہے غم کی بارش ہر آن اس گلی میں

ہم اس گلی کے بارے میں کیا بتائیں تم کو
پھرتے ہیں لیکے کاسہ سلطان اس گلی میں

یہ سوچ کر پجارن بیٹھی ہوئی ہے کب سے
مل جائیں گے کسی دن بھگوان اس گلی میں

تاثیر روح میں بھی پھیلی ہوئی ہے یارو
کھایا تھا اس کے ہاتھوں اک پان اس گلی میں

واقف نہیں ہے کوئی اس رمز سے یہاں پہ
ہم نے کیا ہے خود کو قربان اس گلی میں

غالب وہیں محبت سے آشنا ہوئے تھے
لکھا تھا میر نے بھی دیوان اس گلی میں

آوارگی مقدر شاید نہیں تھی پہلے
ہم کو ملی ہے ساری پہچان اس گلی میں

روشن تھے جو ابد سے سارے چراغ بجھ گئے
آیا ہے جانے کیسا طوفان اس گلی میں

اے دوست خامشی کا ہے اب وہاں بسیرا
رہتا نہیں ہے کوئی انسان اس گلی میں

غزل

میرے سینے میں گھٹن چھوڑ گیا
پھر کوئی مجھ میں چبھن چھوڑ گیا

تھا درختوں کو بھروسہ جس پر
وہ پرندہ بھی چمن چھوڑ گیا

نامہ بر سوچ کہ کیوں کر کوئی
سانس رہتے ہی بدن چھوڑ گیا

اس کی باتوں میں چلا آیا میں
مجھ کو باتوں میں مگن چھوڑ گیا

میں نے بس یونہی کہا تھا جاؤ
وہ مجھے واقعتاً چھوڑ گیا

غزل

تجھ سے اب تیرے طرفدار لڑائی کریں گے
اے محبت ترے بیمار لڑائی کریں گے

بیچنے والا ترا کہہ کے مجھے بیچے گا
اور آپس میں خریدار لڑائی کریں گے

سارے معصوم صفت جنگ میں مر جائیں گے
جب بھی دو قوم کے سردار لڑائی کریں گے

جاہلو!! منبرو محراب سنبھالو جاکر
شیخ اب بر سر بازار لڑائی کریں گے

کوئی الزام نہیں آئے گا سورج پہ کبھی
اب تو سائے پس دیوار لڑائی کریں گے

آج کی رات اگر ابر علم چھٹ جائے
دیکھنا چاند سے غمخوار لڑائی کریں گے

تونے کس خاک سے ایجاد کیا ہے ان کو
کوزہ گر تجھ سے عزادار لڑائی کریں گے

تو ہمیں بانٹ کے اک روز چلا جائے گا
اور ہم خود سے لگاتار لڑائی کریں گے

نظم

خدارا!!!

زندگی کی قید سے مجھکو رہائی دے

مری آنکھوں کے سارے خواب
پلکوں سے  اتر کر  درد کے صحرا میں جا پہنچے

مرے  دل کے نہاں خانے میں 
ساری حسرتوں نے خودکشی کرلی

وہ سارے لوگ جو اپنائیت کا ڈھونگ رچتے تھے

مرے جزبوں کا استحصال کرتے تھے

مرے چاروں طرف موجود ہیں اب بھی

مگر اب اپنے اصلی پیرہن میں ہیں

انا کی جنگ میں
دل کے سبھی رشتوں نے اپنی جان دے دی
زخم اب ناسور بن گئے ہیں

کسی بے نام منزل کی تمنا میں
میں کب تک درد کے صحراؤں میں پھرتا رہوں,انجان رستے پر چلوں

میں کب تک اپنی بکھری  ہستی کو سمیٹوں
خواہشوں کے قبر پر دن رات یونہی فاتحہ پڑھتا رہوں

مجھے جینے کی خواہش تھی
مگر اب زندگی کوہ گراں ہے

مرے معبود اب مجھکو رہائی دے

مجھے آزاد کردے زندگی کی قید سے مولیٰ

انعام عازمی