جو بنا دیتی ہے تقدیر بنے رہتے ہو

جو بنا دیتی ہے تقدیر بنے رہتے ہو

کبھی کابل کبھی کشمیر بنے رہتے ہو

کس کے قیدی ہو کو ڈرتے ہو رہائی سے تم

خود ہی اپنے لیے زنجیر بنے رہتے ہو

کون سا غم ہے جو دیوار سے لگ جاتے ہو

کون سا دکھ ہے جو تصویر بنے رہتے ہو

کس حقیقت سے سدا بھاگتے رہتے ہو تم

اور کس خواب کی تعبیر بنے رہتے ہو

مجھے لگا تھا مری بد دعا نہیں لگتی

پڑا ہوں شہر محبت میں بے در و دیوار

کسی بھی سمت سے مجھکو ہوا نہیں لگتی

میں آج دیکھ کے اس شخص کو اُداس ہوا

مجھے لگا تھا مری بد دعا نہیں لگتی

سنا تھا دل نہیں لگتا بِچھڑ کے تم سے مگر

مجھے تو تم سے بِچھڑ کر غذا نہیں لگتی

تو کیا تمہیں نہیں لگتا کہ جنگ میں ہیں ہم

یہ زندگی تمہیں کیا کربلا نہیں لگتی

بدل گیا ہے ترے بعد شہر خواب و خیال

سو اب یہاں کی بھی آب و ہوا نہیں لگتی

میں بے مدار ہوا ہوں کچھ اس طرح انعام

کوئی بھی شے مجھے اپنی جگہ نہیں لگتی

شکستہ حال ہے پر حوصلہ نہیں ہارا

شکستہ حال ہے پر حوصلہ نہیں ہارا

یقین کر کہ ترا مبتلا نہیں ہارا

اے مجھ کو جیتنے والے میں اب بھی اسکا ہوں

کہ میرے واسطے وہ شخص کیا نہیں ہارا

سنبھال لونگا میں اس لڑکھڑاتی لو کو بھی

چلی تھی پہلے بھی ایسی ہوا نہیں ہارا

کہ اب کے جنگ میں یاروں سے آشنائی ہوئی

میں جنگ ہار کے اس مرتبہ نہیں ہارا

اِک تیر آسمان سے آتا ہے میری سمت

یہ تو جو اتنے دھیان سے آتا ہے میری سمت

لگتا ہے اک پلان سے آتا ہے میری سمت

دشمن کے راستے میں ہے دیوار اس لیے

ہر زخم مہربان سے آتا ہے میری سمت

جب سوچتا ہوں اب کوئی دشمن نہیں رہا

اِک تیر آسمان سے آتا ہے میری سمت

اس موسم بہار کا اب میں شکار ہوں

سو پھول اس کمان سے آتا ہے میری سمت

خود کو بچائے رکھتا ہوں دشمن کے وار سے

لیکن جو خاندان سے آتا ہے میری سمت