غزل

کبھی تو چشم فلک میں حیا دکھائی دے
کہ دھوپ سر سے ہٹے اور گھٹا دکھائی دے

میں اقتباس اذیت ہوں لوح دنیا پہ
سو مجھ میں غم کے سوا اور کیا دکھائی

میں چاہتا ہوں کہ میرے لئے مرے مولی
لب عدو پہ بھی حرف دعا دکھائی دے

چراغ بن کے سدا اس لئے جلے ہم لوگ
ہماری ضد تھی کہ ہم کو ہوا دکھائی دے

کبھی تو صحن گلستاں سے ہو  خزاں رخصت
کبھی تو پیڑ پہ پتہ ہرا دکھائی دے

حصار ذات سے میں اس لئے نکلتا نہیں
مری نظر کو یہاں کون کیا دکھائی دے

زمانے بعد لگا خود کو دیکھ کر ایسا
کہ جیسے خواب میں اک گمشدہ دکھائی دے

انعام عازمی

غزل

اپنے ہونے کی نشانی سے الگ ہو رہا ہے
میرا کردار کہانی سے الگ ہو رہا ہے

تپتے صحراؤں کا کیا حشر ہوا کرتا ہے
اس کو سمجھاؤ جو پانی سے الگ ہو رہا ہے

اب مری بات کا مطلب نہیں ہوتا کچھ بھی
لفظ اس طرح معانی سے الگ ہو رہا ہے

یاں سبھی لوگ پلٹتے ہیں بہاروں کا ورق
سو دل اوراق خزانی سے الگ ہو رہا ہے

جس نے موجوں کے حوالے مری کشتی کر دی
خود ہی دریا کی روانی سے الگ ہو رہا ہے

نظم

میرے دور کے اندھے شاعر
عورت بس جسم سمجھ کر
تم جو اپنی نظموں میں لکھتے آئے ہو
میں یہ تم سے پوچھ رہا ہوں
زلفوں کو بادل لکھنے سے کیا حاصل ہے
آنکھوں کو جگنو لکھنے سے کیا ملتا ہے
سرخ لب و رخسار پہ لکھہ کر کیا پاتے ہو
میرے دور کے اندھے شاعر
گندے شاعر
ایسی ویسی نظمیں لکھنا کب چھوڑوگے
عورت کو بس جسم سمجھنا کب چھوڑو گے
کب سدھروگے
اندھے شاعر
گندی سوچ سے باہر نکلو
اپنے دل کی آنکھیں کھولو
میں کہتا ہوں
عورت کو بیوی مت سمجھو
عورت کو تم ماں مت سمجھو
بہن نہ سمجھو,دوست نہ سمجھو
اندھے شاعر
گندے شاعر
عورت کو کو بس عورت سمجھو
اور پھر سوچو
عورت آخر کیا ہوتی ؟؟
تم پاؤگے
عورت اک آیت ہے جس کو پڑھ کر بھٹکے راہی اپنی بھولی راہ پہ واپس آ جاتے ہیں
عورت  ایسی شمع ہے, جو دل کے اندر پھیلی تاریکی کو اپنے نور سے روشن کر دیتی ہے
عورت ایک صحیفہ ہے, جو جس پر اترے اس کی دنیا جنت جیسی کر دیتی ہے
عورت اپنے اندر مرنے والوں کو بھی زندہ کر دیتی ہے

اندھے شاعر
گندے شاعر
*عورت کو بس جسم سمجھنا ٹھیک نہیں ہے*

غزل

جب سے مرنے کی اداکاری دکھانے لگا ہے
دل کہانی میں سمجھ داری دکھانے لگا ہے

میں اسے تحفے میں آیا ہوں محبت دینے
وہ مجھے درد کی الماری دکھانے لگا ہے

پیرہن کاغزی پہناکے مجھے عشق مرا
جانے کیوں ہجر کی چنگاری دکھانے لگا ہے

اس لئے ہاتھ میں پتھر لئے پھرتے ہیں لوگ
آئنیہ چہرے کی بیماری دکھانے لگا ہے

یہ سفر اس لئے دشوار ہوا جا رہا ہے
راستہ آگے کی دشواری دکھانے لگا ہے

اس تعلق کو نبھانا ہے منافق ہونا
کیونکہ دل آپ سے بیزاری دکھانے لگا ہے

غزل

پھر بکھرنے کی حماقت نہیں کر سکتا میں
تجھ سے دوبارہ محبت نہیں کر سکتا میں

مجھ کو معلوم ہے یہ لوگ منافق ہیں دوست
ایسے لوگوں کی امامت نہیں کر سکتا میں

تجھکو پانے کیلئے جنگ اگر لازم ہے
جیت جانے پہ رعایت نہیں کر سکتا میں

دونوں کردار کہانی سے الگ ہو گئے ہیں
کیا ہوا اس کی وضاحت نہیں کر سکتا میں

میرے ہاتھوں کی لکیروں میں ترا نام نہیں
تو امانت ہے خیانت نہیں کر سکتا میں

جو فسانے کو فسانہ نہیں رہنے دیتے
ایسے لوگوں سے روایت نہیں کر سکتا میں

غزل

جب تو اپنا نہیں لگا مجھ کو
جانے کیا کیا نہیں لگا مجھ کو

تجھ کو اندر سے جانتا ہوں میں
یار چشمہ نہیں لگا مجھ کو

بول تو راستے سے ہٹ جاؤں
یار دھکا نہیں لگا مجھ کو

جس کی تم ہو گئی ہو شہزادی
وہ تمہارا نہیں لگا مجھ کو

دوست اک بات تم سے کہنی ہے
تو کسی کا نہیں لگا مجھ کو

جس کو دیکھوں تو یہ لگے "ہاں یہ"
کوئی ایسا نہیں لگا مجھ کو

تو بدل جائے گا کسی دن دوست
یہ ہمیشہ نہیں لگا مجھ کو

غزل

کیوں بارہا کہتا ہے وفا کچھ بھی نہیں ہے
میرے لئے دل میں ترے کیا کچھ بھی نہیں ہے

میں اپنے تعاقب میں پھرا کرتا ہوں ہر سو
منزل ہے کہاں میری پتہ کچھ بھی نہیں

عنوان مجھے کس لئے ہے تم نے بنایا
جب رول کہانی میں مرا کچھ بھی نہیں ہے

میں وقت کی گٹھری لئے چلتا ہوں ہمیشہ
جس میں تری یادوں کے سوا کچھ بھی نہیں ہے

کس خاک سے ایجاد کیا ہے مجھے رب نے
اس طرح سے ٹوٹا ہوں بچا کچھ بھی نہیں ہے

میں خود سے جدا ہو گیا ہوں, میرے لئے اب
ہر لمحہ اذیت کے کے سوا کچھ بھی نہیں ہے

منسوب تجھے خود سے کچھ اس طرح کیا ہے
اب مجھ میں مری جان مرا کچھ بھی نہیں ہے

غزل

دیکھ لینا کبھی ایسا نہیں ہونے دوں گا
تجھ کو اپنے لئے رسوا نہیں ہونے دوں گا

مرکزی رول نبھانا ہے یہاں سے مجھ کو
میں کہانی میں تماشہ نہیں ہونے دوں گا

ہاں میں سورج کا طرف دار نہیں ہوں,لیکن
اپنی بستی میں اندھیرا نہیں ہونے دوں گا

تم اگر مجھ کو مکمل نہیں کر سکتے ہو
میں بھی تم کو کبھی پورا نہیں ہونے دوں گا

ڈوب سکتی ہیں کئی کشتیاں آکر ان میں
*قطرہ ء اشک کو دریا نہیں ہونے دوں گا*

جوش میں ہوش کا دامن نہیں چھوڑوں گا میں
عشق میں عقل کو اندھا نہیں ہونے دوں گا

میری خواہش ہے یہی اس کا بھلا ہو ہر دم
جس کو لگتا ہے میں اچھا نہیں دوں گا

غزل

*آئی بہار پھول کھلے جام بھر گئے*
دل میں تمہاری یاد کے  موسم اتر گئے

میں آیا تھا گزارنے دنیا میں وقت کچھ
اور یوں ہوا کہ مجھ میں زمانے
گزر گئے

اک روز لگ کے اپنے گلے روئے رات بھر
دل کو ملے تھے جتنے  سبھی زخم بھر گئے

ہم ایک زندگی میں کئی موت مر گئے

کچھ دن تمہارے پاس تھے ہم اتنا یاد ہے
ﷲ جانے تم سے بچھڑ کے کدھر گئے

انعام ہازمی

غزل

یہ جو ہم جبہ و دستار سنبھالے ہوئے ہیں
ایسا لگتا ہے کہ بیکار سنبھالے ہوئے ہیں

تجھکو معلوم نہیں تیری ہنسی کو اب تک
تیرے لب پر ترے غم خوار سنبھالے ہوئے ہیں

ہم کو معلوم ہے ٹوٹی تو قیامت ہوگی
اس لئے بیچ کی دیوار سنبھالے ہوئے ہیں

کل جہاں آپ نے بیچا تھا ہمیں آج وہیں
ہم خریدار ہیں بازار سنبھالے ہوئے ہیں

بس یہی بات  مجھے سب سے بری لگتی ہے
یار کو بزم میں اغیار سنبھالے ہوئے ہیں

ہائے کیا عشق کا منظر ہے مری آنکھوں میں
پھول کو شاخ پہ کچھ خار سنبھالے ہوئے ہیں

ہم نہیں لوٹتے عزت تری اجلاسوں میں
شاعری ہم ترا معیار سنبھالے ہوئے ہیں