غزل

وہ کشتی جو پانی میں تھی
عجب خوشگمانی میں تھی
جو قسمت میں تھی غیر کے
مری   زندگانی    میں    تھی
میں اپنی جوانی میں تھا
وہ اپنی جوانی میں تھی
حقیقیت نہیں خواب تھی
جو میری کہانی میں تھی
یوں راجا نہیں مر گیا
کوئی بات رانی میں تھی
بہا   لے    گئی    زندگی
ندی جو روانی میں تھی

نظم

آج کل زندگی
ہے عجب راہ پر گامزن
یہ کہاں جائیگی کچھ خبر ہی نہیں
آج کل ہر گھڑی
ہے تردد کا احساس دل میں مکیں
چیختی ہے صدا میرے اندر کوئی
اک کسک سی ابھرتی ہے دل میں مرے
جیسے میں
اک اداسی کے گہرے سمند میں گر جاؤں گا
گر کے مر جاؤں گا
میں اگر بچ گیا
تو بھی کیا فائدہ
کوئی ایسا نہیں
جو اداسی کے گہرے سمندر سے باہر نکالے مجھے
جو مرا ساتھ دے
جو سنبھالے مجھے
خیر یہ بات ہے بعد کی
یہ محض واہمہ ہے مرا
ان دنوں تو فقط ایک ہی ڈر ہے مجھ کو کہ میں
بڑھ رہا ہوں جدھر
میری منزل کا وہ راستہ ہی نہیں
سچ کہوں ان دنوں
ایسا لگنے لگا ہے مجھے
جیسے اک آگ مجھ میں بھڑک جائے گی
میری ہر خواہشیں راکھ ہو جائیں گی
میرے ہر خواب آنکھوں میں ہی دفن ہو جائیں گے
اور میرا وجود
جو اب ہے ہی نہیں
ختم ہو جائے گا

انعام عازمی

غزل

غزل

ہر وقت اب زوال ہے میں ہوں کہ میں نہیں
صورت عجب بحال ہے میں ہوں کہ میں نہیں

تو جانتا ہے مجھکو بہت ہی قریب سے
تجھ سے مرا سوال ہے میں ہوں کہ میں نہیں

تصویر آئینے میں مری مجھ سے ہے الگ
اے یار کیا خیال ہے میں ہوں کہ میں نہیں

آنکھوں میں دفن ہو گئے میرے تمام خواب
اور جسم پایمال ہے ,میں ہوں کہ میں نہیں

ہے کشمکش میں ذات میری کب سے مبتلا
کتنا عجیب حال ہے ,میں ہوں کہ میں نہیں

ہر شخص اب خموش ہے منظر سبھی خموش
دھڑکن کی ایک تال ہے, میں ہوں کہ میں نہیں

رد کر رہی ہے زیست مجھے جس طرح انعام
اب تو یہی سوال ہے میں ہوں کہ میں نہیں

انعام عازمی

غزل

ﺗﻮ ﮨﯽ ﺩﯾﻨﺎ ﻣﯿﮟ ﺻﻨﻢ ﺍﯾﮏ ﻧﮩﯿﮟ, ﺑﮭﺎﮌ ﻣﯿﮟ ﺟﺎ
تجھ سے بہتر تو ہزاروں ہیں یہیں , بھاڑ میں جا

ہم  پہ احسان نہ کر, چھوڑ ہمیں, راستہ لے
دل لگالیں گے ہم اب اور کہیں, بھاڑ میں جا

تو اذیت ہے,مصیبت ہے,بلا ہے کوئی
تجھ سا دیکھا ہی نہیں میں نے کہیں, بھاڑ میں جا

ہے خبر مجھکو مری جان کی دشمن ہو تم
کیا کہا تم نے؟ کروں تم پہ یقیں ؟ بھاڑ میں جا

مانتا ہوں کہ کبھی پیار کیا تھا تم سے
اب نہیں ہے تو مرے دل کا مکیں ,بھاڑ میں جا

انعام عازمی

غزل

جانے والا بھول چکا ہے
کوئی رستہ دیکھ رہا ہے

خاموشی اب بول رہی ہے
چہرے پہ سب کچھ لکھا ہے

بیچ میں اک دیوار کھڑی ہے
دونوں جانب سے رستہ ہے

آنکھ حقیقت دیکھ رہی ہے
ذہن پھر بھی خواب سجا ہے

"سپنے بھی سچ ہو جاتے ہیں"
جھوٹ ہے یہ,کس نے لکھا ہے؟

چھوٹی ہے چاہت کی چادر
غم کا پاؤں بہت لمبا ہے

نا بینوں کے شہر میں جاکر
کس نے آئینہ رکھا ہے

اس کے  جانے سے دنیا میں
کتنا سناٹا پھیلا ہے

نا امیدی کے آنچل میں
امیدوں کا  ایک دیا ہے

غم کی ایک کہانی  پھر سے
وقت ابھی لکھنے بیٹھا ہے

ڈوب گیا ہے سورج شاید
چاروں جانب اندھیرا ہے

غزل

--------------------- ‏( ﻏﺰﻝ ‏) --------------------
ﺧﺪﺍ ﺟﺎﻧﮯ ﻭﮦ ﮐﯿﺴﺎ ﺣﺎﺩﺛﮧ ﺗﮭﺎ
ﺟﻮ ﻣﯿﺮﮮ ﺧﻮﺍﺏ ﮐﮯ ﺍﻧﺪﺭ ﮨﻮﺍ ﺗﮭﺎ
ﭘﺮﻧﺪﮮ ﺁﺳﻤﺎﮞ ﻣﯿﮟ ﺍﮌ ﺭﮨﮯ ﺗﮭﮯ
ﺷﮑﺎﺭﯼ ﺟﺎﻝ ﮐﮯ ﺍﻧﺪﺭ ﭘﮭﻨﺴﺎ ﺗﮭﺎ
ﻣﺤﻞ ﺍﻣﯿﺪ ﮐﺎ ﻭﯾﺮﺍﻥ ﺗﮭﺎ ﭘﺮ
ﺩﯾﺎ ﺍﮎ ﻃﺎﻕ ﻣﯿﮟ ﺭﮐﮭﺎ ﮨﻮﺍ ﺗﮭﺎ
ﺍﺩﺍﺳﯽ ﺑﺎﻝ ﮐﮭﻮﻟﮯ ﺳﻮ ﺭﮨﯽ ﺗﮭﯽ
ﺟﮩﺎﮞ ﭘﺮﯾﻮﮞ ﮐﺎ ﺍﮎ ﻣﯿﻼ ﻟﮕﺎ ﺗﮭﺎ
ﺍﻧﮭﯿﮟ ﺟﻮ ﺍﭘﻨﮯ ﺍﻧﺪﺭ ﻣﺮ ﭼﮑﮯ ﺗﮭﮯ
ﺳﺮ ﻣﻘﺘﻞ ﭘﮑﺎﺭﺍ ﺟﺎ ﺭﮨﺎ ﺗﮭﺎ
ﮔﻠﯽ ﺧﺎﻣﻮﺵ ﺗﮭﯽ ﻟﯿﮑﻦ ﮐﮩﯿﮟ ﭘﺮ
ﮐﻮﺋﯽ ﺭﮦ ﺭﮦ ﮐﮯ ﺍﮐﺜﺮ ﭼﯿﺨﺘﺎ ﺗﮭﺎ
ﺿﺮﻭﺭﺕ ﺗﮭﯽ ﻣﺠﮭﮯ ﺟﺲ ﺷﺨﺺ ﮐﯽ ﻭﮦ
ﮐﺴﯽ ﮐﯽ ﺁﺭﺯﻭ ﻣﯿﮟ ﻣﺮ ﭼﮑﺎ ﺗﮭﺎ
" ﻣﺤﺒﺖ ﺟﺎﻥ ﻟﯿﻮﺍ ﺣﺎﺩﺛﮧ ﮨﮯ "
ﮐﻮﺋﯽ ﺩﯾﻮﺍﺭ ﭘﺮ ﯾﮧ ﻟﮑﮫ ﺭﮨﺎ ﺗﮭﺎ
ﭘﺠﺎﺭﻥ ﻣﺮ ﮔﺊ ﺗﮭﯽ ﺳﺮ ﭘﭩﮏ ﮐﺮ
ﺗﺐ ﺍﺱ ﮐﺎ ﺩﯾﻮﺗﺎ ﭘﺮﮐﭧ ﮨﻮﺍ ﺗﮭﺎ
ﮐﮩﺎﻧﯽ ﺧﺘﻢ ﮨﻮﻧﮯ ﺟﺎﺭﮨﯽ ﺗﮭﯽ
ﻣﯿﮟ ﺳﺐ ﮐﭽﮫ ﺑﮭﻮﻝ ﺟﺎﻧﺎ ﭼﺎﮨﺘﺎ ﺗﮭﺎ
ﺍﻧﻌﺎﻡ ﻋﺎﺯﻣﯽ