غزل

تم کیا جانو کیا ہوتا ہے
جب کوئی تنہا ہوتا ہے

کھو جاتی ہے اس میں دنیا
جس کا دل دریا ہوتا ہے

خوابوں کی ہے بات نرالی
جو چاہو ویسا ہوتا ہے

میری باتیں کرتا ہے وہ???
کیا اب بھی ایسا ہوتا ہے

خود میں یوں کھویا رہتا ہوں
جیسے اک بچا ہوتا ہے

میں روشن ہوں غیر کی خاطر
جیسے ایک دیا ہوتا ہے

لگتا ہے وہ بالکل ویسا
جیسا اک سپنا ہوتا ہے

ہر چہرے کے اندر یارو
ایک نیا چہرا ہوتا ہے

جو کرتا ہے سچی باتیں
وہ بالکل اپنا ہوتا ہے

میں نے اکثر دیکھا ہے یہ
جو چاہو الٹا ہوتا ہے

سب کو مر جانا ہے اک دن
ہر وعدہ جھوٹا ہوتا ہے

ناممکن ہو جس کو پانا
وہ کتنا اچھا ہوتا ہے

عشق ہوا ہے پھر سے مجھ کو
دیکھو پھر کیا کیا ہوتا ہے

انعام عازمی

غزل

ایک مدت سے ہے یہ دل ناشاد
کوئی آتا رہا ہے اکثر یاد

ایک تعبیر ہو گئی پوری
یعنی اک خواب ہو گیا برباد

اے خدا ہار مان لی میں نے
اب دعا ہے نہ ہے کوئی  فریاد

کوئی ویران کر گیا ایسے
پھر یہ بستی نہیں ہوئی آباد

یہ جو دنیا ہے قید خانہ ہے
جس میں پھرتا ہر کوئی آزاد

عشق ہے درد کی وجہ صاحب
یعنی غم عشق کی ہے اک ایجاد

داستاں ختم ہو گئی,شیریں!!
مر گیا آج آپ کا فرہاد

انعام

غزل

میرے فون میں اک ایسا نمبر بھی ہے
جس سے پہلے روزانہ
شام کا سورج ڈھلتے ہی کال آتا  تھا
پچھلے چند مہینوں سے
اس نمبر سے ایک بھی کال نہیں آیا
اور اب آئے گا بھی نہیں
میں شام کو اپنے کالج سے
جب لوج میں اپنے آتا ہوں
میں  گھنٹوں اس نمبر کو
یوں ہی دیکھتا رہتا ہوں
شاید مجھکو لگتا ہے
اس نمبر سےشاید پھر
کوئی کال آئیگا
اک آواز سنائی دے گی
بیٹا! بولو کیسے ہو ؟
کوئی دقت ہے بیٹا؟ طبیعت کیسی رہتی ہے؟
کھانا ٹھیک سے کھاتے ہو؟
چھٹی میں گھر آ جانا

لیکن اب اس نمبر سے
کوئی کال نہیں آتا
وہ نمبر "ابو جان" کا ہے
روٹھ کے جو اس دنیا سے
تنہا ہم کو چھوڑ گئے

غزل

وہ جو اک حقیقت تھا خواب بن گیا ہے کیا
زندگی میں پھر کوئی حادثہ ہوا ہے کیا

شہر کی فضاؤں میں یہ اداسیاں کیسی
اسکی یاد میں ابتک شہر رو رہا ہے کیا

آجکل میں خود سے بھی دور دور رہتا ہوں
زندگی کا ہر قصہ ختم ہو رہا ہے کیا

سارے خواب آنکھوں سے ہو کے آ گئے باہر
کچھ سمجھ نہیں آتا۔جانے ماجرا ہے کیا

اک عجیب  بے چینی میرے دل میں رہتی ہے
وقت کی ہتھیلی پر حادثہ لکھا ہے کیا

شہر میں کہیں سے بھی اب صدا نہیں آتی
میرا چاہنے والا کوچ کر  گیا ہے کیا

آتے جاتے چہروں کو ایسے دیکھتے کیوں ہو
کوئی بے طرح پھر سے یاد آ رہا ہے کیا

کب تلک رہوگے تم انتظار میں اسکے
جا کے اپنی دنیا میں کوئی لوٹتا ہے کیا

کیوں کلام میں تیرے سوز و ساز ہے انعام
درد کی حدوں کو تو پار کر گیا ہے کیا

انعام عازمی

غزل

اب دئے کو بجھا دیجئے
نام لیکر صدا دیجئے

میرے بارے میں ہے جاننا۔؟
خاک لیکر اڑا دیجئے

پہلے میں زندگی سونپ دوں
شوق سے پھر دغا دیجئے

آپ ہم راز ہیں اس لئے
راز سب کو بتا دیجئے

حادثے اب نہیں ہو رہے
پھر سے کوئی دعا دیجئے

میں بچھڑنے کو تیار  ہوں
مجھکو کو خود سے ملا دیجئے

راحت قلب کے واسطے
نقش ماضی مٹا دیجئے

غزل

ٹل گیا ایک حادثہ پھر سے
یعنی کچھ بھی نہیں ہوا پھر سے

شور کرنے لگی ہے خاموشی
کوئی دینے لگا صدا پھر سے

خود سے بیزار ہو گیا ہوں میں
آ گیا کیسا مرحلہ پھر سے

پھر دعا میں اسی کو مانگا ہے
بخش دینا مجھے خدا پھر سے

کوئی امید پھر سے  جاگی ہے
جل رہا ہے بہاں دیا پھر سے

عشق ناکام پھر نہ ہو جائے
کر رہا ہوں میں انتہا  پھر سے

اپنا  قصہ تمام ہونا ہے
آؤ کر لیں کوئی خطا پھر سے

یہ غلط ہے ۔جو تم نے سوچا ہے
میرے بارے میں سوچنا پھر سے

پھر کہانی میں موڑ آیا ہے
کوئی کردار مر گیا پھر سے

بس اسی بات سے ہے اب خطرہ
ہو گئے لوگ با وفا پھر سے

ہو گیا ہے وہ  بانٹ کر رخصت
درد ہی درد ہر جگہ پھر سے

انعام عازمی