غزل

جو چلا آتا ہے خوابوں کی طرفداری کو
اس نے دیکھا ہی نہیں عالم بیزاری کو

پیرہن چاک نہ ہو جائے مرے خوابوں کا
کوئی تبدیل کرے رسم عزاداری کو

چارہ گر جب تجھے احساس نہیں ہے تو پھر
کون سمجھے بھلا بیمار کی بیماری کو

میں نے سوچا تھا جو بکنے سے بچا لیں گے مجھے
دوڑ کر آئے  وہی میری خریداری کو

عالم خواب میں ہے جس کی حکومت یارو
وہ سمجھتا ہے بغاوت مری بیداری کو

دل کے صحرا کو سمندر سے بچا لے مولیٰ
اس قدر سہل نہ کر تو مری دشواری کو

کتنے بھولے ہیں تری بزم میں بیٹھے ہوئے لوگ
سچ سمجھتے ہیں سبھی تیری اداکاری کو

غزل

اے محبت تو مجھے درد جدائی نہیں دے
اپنے زندان میں رکھ مجھ کو رہائی نہیں دے

میں اگر دیکھنا چاہوں بھی تمارے سوا کچھ
بس اندھیرا ہو مجھے کچھ بھی دکھائی نہیں دے

یوں نہ ہو عشق کا دستور معطل ہو جائے
میرے محبوب مرے حق میں گواہی نہیں دے

لب اگر چاہیں غم عشق بیاں کرنے کو
شور اتنا ہو مجھے کچھ بھی سنائی نہیں دے

دل کو  آرام کسی طور نہیں ملنا ہے
درد بڑھنے دے مرے دوست دوائی نہیں دے

چل تو سکتا ہوں ترے ساتھ مگر ڈر ہے یہی
یہ سفر پھر سے مجھے آبلہ پائی نہیں دے

غزل

ہم درختوں کو اگر جڑ سے گرانے لگ  جائیں
ان پرندوں کے تو پھر ہوش ٹھکانے لگ جائیں

ہم سفر تو ہی بتا کیسا لگے گا تجھ کو
ہم بچھڑنے پہ اگر جشن مانے لگ جائیں

یہ بھی ہو سکتا ہے چپ چاپ تماشہ دیکھیں
یا سر بزم جنوں رقص دکھانے لگ جائیں

راہ لے ہمیں چھوڑ دے اے مست خرام
یوں نہ ہو ہم تجھے صحرا میں پھرانے لگ جائیں

یہ بھی ممکن ہے پلٹ کر نہیں دیکھیں تجھ کو
یہ بھی ممکن ہے تجھے دل میں بسانے لگ جائیں

یہ بھی ممکن ہے کہ خاموشی زباں بن جائے
یہ بھی ممکن ہے ہم شور مچانے لگ جائیں

یہ بھی ممکن ہے کہ ہم تجھ کو گوارا نہ کریں
یہ بھی ممکن ہوں ترا ناز اٹھانے لگ جائیں

یہ بھی ہو سکتا ہے ہم تیری کہانی سن لیں
یہ بھی ممکن ہے ہے تمہیں شعر سنانے لگ جائیں

غزل

لایے تھے عشق پر ہم  ایمان اس گلی میں
یعنی کئے تھے اپنا نقصان اس گلی میں

جینا نہیں ہے یارو آسان اس گلی میں
ہوتی ہے غم کی بارش ہر آن اس گلی میں

ہم اس گلی کے بارے میں کیا بتائیں تم کو
پھرتے ہیں لیکے کاسہ سلطان اس گلی میں

یہ سوچ کر پجارن بیٹھی ہوئی ہے کب سے
مل جائیں گے کسی دن بھگوان اس گلی میں

تاثیر روح میں بھی پھیلی ہوئی ہے یارو
کھایا تھا اس کے ہاتھوں اک پان اس گلی میں

واقف نہیں ہے کوئی اس رمز سے یہاں پہ
ہم نے کیا ہے خود کو قربان اس گلی میں

غالب وہیں محبت سے آشنا ہوئے تھے
لکھا تھا میر نے بھی دیوان اس گلی میں

آوارگی مقدر شاید نہیں تھی پہلے
ہم کو ملی ہے ساری پہچان اس گلی میں

روشن تھے جو ابد سے سارے چراغ بجھ گئے
آیا ہے جانے کیسا طوفان اس گلی میں

اے دوست خامشی کا ہے اب وہاں بسیرا
رہتا نہیں ہے کوئی انسان اس گلی میں

غزل

میرے سینے میں گھٹن چھوڑ گیا
پھر کوئی مجھ میں چبھن چھوڑ گیا

تھا درختوں کو بھروسہ جس پر
وہ پرندہ بھی چمن چھوڑ گیا

نامہ بر سوچ کہ کیوں کر کوئی
سانس رہتے ہی بدن چھوڑ گیا

اس کی باتوں میں چلا آیا میں
مجھ کو باتوں میں مگن چھوڑ گیا

میں نے بس یونہی کہا تھا جاؤ
وہ مجھے واقعتاً چھوڑ گیا

غزل

تجھ سے اب تیرے طرفدار لڑائی کریں گے
اے محبت ترے بیمار لڑائی کریں گے

بیچنے والا ترا کہہ کے مجھے بیچے گا
اور آپس میں خریدار لڑائی کریں گے

سارے معصوم صفت جنگ میں مر جائیں گے
جب بھی دو قوم کے سردار لڑائی کریں گے

جاہلو!! منبرو محراب سنبھالو جاکر
شیخ اب بر سر بازار لڑائی کریں گے

کوئی الزام نہیں آئے گا سورج پہ کبھی
اب تو سائے پس دیوار لڑائی کریں گے

آج کی رات اگر ابر علم چھٹ جائے
دیکھنا چاند سے غمخوار لڑائی کریں گے

تونے کس خاک سے ایجاد کیا ہے ان کو
کوزہ گر تجھ سے عزادار لڑائی کریں گے

تو ہمیں بانٹ کے اک روز چلا جائے گا
اور ہم خود سے لگاتار لڑائی کریں گے

نظم

خدارا!!!

زندگی کی قید سے مجھکو رہائی دے

مری آنکھوں کے سارے خواب
پلکوں سے  اتر کر  درد کے صحرا میں جا پہنچے

مرے  دل کے نہاں خانے میں 
ساری حسرتوں نے خودکشی کرلی

وہ سارے لوگ جو اپنائیت کا ڈھونگ رچتے تھے

مرے جزبوں کا استحصال کرتے تھے

مرے چاروں طرف موجود ہیں اب بھی

مگر اب اپنے اصلی پیرہن میں ہیں

انا کی جنگ میں
دل کے سبھی رشتوں نے اپنی جان دے دی
زخم اب ناسور بن گئے ہیں

کسی بے نام منزل کی تمنا میں
میں کب تک درد کے صحراؤں میں پھرتا رہوں,انجان رستے پر چلوں

میں کب تک اپنی بکھری  ہستی کو سمیٹوں
خواہشوں کے قبر پر دن رات یونہی فاتحہ پڑھتا رہوں

مجھے جینے کی خواہش تھی
مگر اب زندگی کوہ گراں ہے

مرے معبود اب مجھکو رہائی دے

مجھے آزاد کردے زندگی کی قید سے مولیٰ

انعام عازمی

4 شعر

نہ جانے کون سا قصہ سنا رہا تھا مجھے
وہ ہنس رہا تھا مگر اس کی آنکھ بھر چکی تھی

میں تجھ سے کیسے بتاؤں کہ عمر کیسے کٹی
میں جی رہا تھا مگر زندگی گزر چکی تھی

اے میرے دوست مرے ٹوٹنے بکھرنے کا
قصور وار فقط دل تھا,عقل مر چکی تھی

میں کیسے دل کو بچاتا تباہ ہونے سے
زمین دل پہ وہ دلکش پری اتر چکی تھی

غزل

میں جسم ہوں تو ہے جان پیا
ہے تجھ پہ مرا ایمان پیا

تو میری خاطر اترا ہے
اس دنیا میں,یہ مان پیا

تو سوہنا ہے من موہنا ہے
سب کچھ تجھ پر قربان پیا

آ عشق کا بادل برسادے
میں بستی ہوں ویران, پیا

تو رستہ ہے تو منزل ہے
تو ہے میری پہچان پیا

دل دید کو تیری ترسے ہے
ہو میری اور بھی دھیان پیا

میں عشق کی مندر کا سادھو
تو ہے میرا بھگوان پیا

انعام عازمی

غزل

تمام عمر جسے چیخ کر پکارا گیا
زمین دل پہ وہ اب تک نہیں اتارا گیا

کہیں پہ درد کا صحرا کہیں پہ غم پہاڑ
عیجب راہوں سے ہر دم مجھے گزارا گیا

ذرا سی ٹھیس لگی اور ٹوٹنے لگا میں
نہ جانے کیسے مری خاک کو سنوارا گیا

خدا نے میرے مقدر میں جانے کیا لکھا تھا
صلیب درد پہ ہر بار مجھکو وارا گیا

عجیب موڑ پہ دریا نے لوٹ لی کشتی
مرے گمان سے آگے تلک کنارا گیا

غزل

تمہیں یہ کس نے کہا ہم شراب پی رہے تھے
ہمارے دل کے سبھی غم شراب پی رہے تھے

عجیب بات تھی جو لوگ پی نہ سکتے تھے
تمہارے ہجر میں پیہم شراب پی رہے تھے

خدائے جبر نے ایسی سزا سنائی تھی
ہم ایک موڑ پہ باہم شراب پی رہے تھے

تمام عمر مجھے درد نے رلایا تھا
ملا نہ زخم کو مرہم شراب پی رہے تھے

کسی نے توڑ دیا تھا گمان کا مندر
تھا احتجاج کا موسم شراب پی رہے تھے

تمہارا ہجر مناے کی آرزو تھی. سو ہم
تمہاری یاد میں ہر دم شراب پی رہے تھے

میں جانتا ہوں کہ پینا حرام ہے لیکن
تھے اپنی ذات سے برہم شراب پی رہے تھے

انعام عازمی

نعت شریف

مجھ پہ گر حرف محبت کبھی نازل ہو حضور
آپ کی ذات کا دیوانہ مرا دل ہو حضور

میں پکاروں تو مجھے آکے بچا لینا آپ
جب بھی کشتی مری طوفاں کے مقابل ہو حضور

اپنی پلکوں سے غبار رہ طیبہ چوموں
آپ کا شہر مری آخری منزل ہو حضور

ہے یہی آخری خواہش مری چشم تر میں
آپ آجائیں اگر آپ کے قابل ہو حضور

دل کی خواہش ہے زمانے سے رہائ لیکر
آپ کی قید میں یہ طائر بسمل ہو حضور

جب مجھے آپ کی امت میں اتارا گیا ہے
حشر کے روز بھلا کیوں کوئی مشکل ہو حضور

غزل

سورج    بنائیے   نہ ستارا   بنائیے
جو دل کو بھا سکے وہی چہرہ بنائیے

ہاں میں تمام عمر اندھیرا بنا رہا
اب آپ مجھ کو چھو کے سویرا بنائیے

میں دل لگی کا آپ کو پھر سے ثبوت دوں
یعنی پھر آپ اس کا تماشہ بنائیے

کیوں تشنگی سے آپ گلہ کر رہے ہیں اب
کس نے کہا تھا آپ کو صحرا بنائیے

بے کار اپنے وقت کو ضائع نہ کیجئے
منزل اگر نہ بن سکے رستہ بنائیے

کب اتاریے گا اداسی کے نقش کو
بس کیجئے حضور کچھ اچھا بنائیے

سب کر رہے ہیں شاعری, انعام اس لئے
اپنا الگ ہی اک لب و لہجہ بنائیے

نظم

رات کے پونے تین بجے ہیں
سوچ رہا ہوں
پیارے ابو آپ جو ہوتے
مجھ سے کہتے
"بیٹا سوجا__.صبح سویرے اٹھنا بھی ہے
کالج بھی جانا ہے تم کو"
لیکن اب
آپ نہیں ہیں
یعنی میرا کوئی نہیں ہے
اب میں پوری رات یونہی جاگا کرتا ہوں
تنہائی سے دیر تلک باتیں کرتا ہوں
دل کو بہلانے کی خاطر سگریٹ بھی لیتا ہوں
لیکن ابو!!
دل بہلانا مشکل ہے
اپنی ذات میں واپس آنا مشکل ہے
پیارے ابو!!
اک لڑکی ہے
نام نہیں لوں گا اس کا
نام سے آخر کیا لینا ہے
اچھی ہے....بلکہ سب سے اچھی ہے
رات کے خاموشی میں مجھ سے باتیں کرتی رہتی ہے
میں ہنستا ہوں تو ہنستی ہے
میں روتا ہوں تو روتی ہے
پاگل ہے...بالکل پاگل ہے
میرے غم کو بھی اپنا غم کہتی ہے
ابو!!
میں اس کو کیسے سمجھاؤں
میں تاریکی کا حصہ ہوں
غم مجھ پر نازل ہوتے ہیں
میری ذات کے اندر کا خالی پن اس کی جان بھی لے سکتا ہے
درد کی  ٹوٹی کرچیاں اس کو چبھ سکتی ہیں
مجھ کو اس دنیا سے جانے کی جلدی
اور یہ پاگل روک رہی ہے
خود سے اپنے قسمت کے پنوں پر غم کی ایک کہانی لکھنے کو بیٹھی ہے
مر سکتی ہے  ....بلکہ مر جائے گی
پاگل لڑکی مجھ کو پاکر

غزل

*جو روشنی کا یہاں اتنظام کرتے ہیں*
*اندھیرے جھک کے انہیں کو سلام کرتے ہیں*

*رسول عشق پہ ایمان ہم نے لایا ہے*
*سو دشمنوں کا بھی ہم احترام کرتے ہیں*

*جو اسم و جسم کو باہم نبھا نہیں سکتے*
*وہ لوگ عشق میں بیکار کام کرتے ہیں*

*جہاں خیال کا دریا بھی سوکھ جاتا ہے*
*ہم اہل فکر وہیں صبح و شام کرتے ہیں*

*ہمارے خواب کی نسبت تمہاری خاک سے ہے*
*سو زندگی بھی تمہارے ہی نام کرتے ہیں*

نظم

*آخری نظم*

ملامت گر!!
بہت مایوس بیٹھے ہو
ہوا کیا ہے
مربی!!
میں  کسی گمنام منزل کا مسافر تھا
سدا انجان رستوں پہ بھٹکتا تھا
انہیں انجان رستوں پر مجھے غالب ملے...حسرت ملے...ساحر ملے
جون اور ناصر نے سمجھایا
کہ میں یعنی ملامت گر
ادب کے آنے والے دور کا تنہا  ستارا ہوں
مجھے ان کا ادھورا کام کرنا ہے
پرندوں کو درختوں سے ملانا ہے
مجھے دریا سے جاکر دل لگانا ہے
سبھی دیواریں مجھکو توڑنی ہیں اور نیا رستہ بنانا ہے
مجھے صحراؤں کے دل میں اترنا ہے
سو آدم زاد یعنی جون نے مجھ کو نئے  رستے پہ لاکر رکھ دیا
اور میں
نئی منزل کی جانب بارہا یہ سوچ کر بڑھتا رہا
مجھ کو ادھورا کام کرنا ہے
مربی سن!!
ادب کی سرزمیں پہ میں نے جب پہلا قدم رکھا
وہاں موجود لوگوں نے مجھے دل سے لگایا
اپنی پلکوں پر بٹھایا اور محبت دی

ابھی کچھ دن ہی گزرے تھے
کہ میں یعنی ملامت گر
اداسی کے سبھی منظر کو لفظی پیرہن دینے لگا
جو اپنی ذات میں ٹوٹے ہوئے تھے ان کا نوحہ بھی لکھا
ادب کے نام پر عریانیت پھیلا رہے تھے جو
انہیں ٹوکا
سدا بے بحر مصرع کو ترنم میں سجا کر گا رہے تھے
جو انہیں ٹوکا
کسی کی آنکھ تارا بنا  اور میں کسی روح کو چبھنے لگا
سو اک دن علمی بونوں نے
ادب کی بزم میں لاکر
مجھے
یعنی ملامت گر کو سمجھایا

میاں تعظیم کر ان کی
جو نثری نظم لکھ کر خود کو شاعر مانتے ہیں
ادب کی محفلوں میں جو اداکاری دکھاتے ہیں
جو حوا کو سر بازار لانا چاہتے ہییں

مربی!! آج میں
یعنی ملامت گر
ملامت بھیجتا ہوں اور یہ اقرار کرتا ہوں
ادب کی یہ نئی دنیا مرے لائق نہیں ہے
میں کسی گمنام منزل کی تمنا میں کسی انجان رستے پر بھٹکنا چاہتا ہوں پھر

انعام

غزل

تجھ سے اب تیرے طرفدار لڑائی کریں گے
اے محبت ترے بیمار لڑائی کریں گے

بیچنے والا ترا کہہ کے مجھے بیچے گا
اور آپس میں خریدار لڑائی کریں گے

سارے معصوم صفت جنگ میں مر جائیں گے
جب بھی دو قوم کے سردار لڑائی کریں گے

جاہلو!! منبرو محراب سنبھالو جاکر
شیخ اب بر سر بازار لڑائی کریں گے

کوئی الزام نہیں آئے گا سورج پہ کبھی
اب تو سائے پس دیوار لڑائی کریں گے

آج کی رات اگر ابر الم چھٹ جائے
دیکھنا چاند سے غمخوار لڑائی کریں گے

تونے کس خاک سے ایجاد کیا ہے ان کو
کوزہ گر تجھ سے عزادار لڑائی کریں گے

وہ ہمیں بانٹ کے اک روز چلا جائے گا
اور ہم خود سے لگاتار لڑائی کریں گے

غزل

*غزل*

در امید  مقفل نہیں ہوا اب تک
میں تیرے ہجر میں پاگل نہیں ہوا اب تک

تمام عمر خوشی ساتھ دے نہیں پائی
نزول غم بھی مسلسل نہیں ہوا اب تک

ترے بغیر جو اک مسئلہ بنا ہوا تھا
تو مل گیا  بھی تو وہ حل نہیں ہوا اب تک

میں اس کو بھول چکا ہوں,عجیب بات ہے یہ
جو چہرہ آنکھ سے اوجھل نہیں ہوا اب تک

تغیرات نے دستور سب بدل ڈالے
اصول عشق معطل نہیں ہوا اب تک

نہ جانے کون مصور بنا رہا ہے مجھے
مرا وجود مکمل نہیں ہوا اب تک

یہ تیرے عشق کی توہین ہے پری زادی
میں تیری یاد میں بیکل نہیں ہوا اب تک

انعام عازمی