نظم -برما

خدائے برترو بالا
کہاں ہے تو؟؟
ہماری چیخ تجھ تک کیوں نہیں جاتی؟؟
دعائیں کیوں ترے دربار سے خالی زمیں پر لوٹ آتی ہیں
خدائے بر ترو بالا
تری دھرتی اجاڑی جا رہی ہے اب
تری مخلوق ماری جا رہی ہے جو تمہیں اپنا خدا تسلیم کرتی ہے
تری تعظیم کرتی ہے
خدائے برترو بالا
یہ ظالم جو ترے ہونے کا بھی انکار کرتے ہیں
یہ خوش یہ  بہت خوش ہیں
کہ تیرے نام لیوا مر رہے اور تو ان پر کرم اک نظر بھی اب نہیں کرتا
خدائے برترو بالا
ہماری عورتوں کی عزتوں پر آنچ آنے سے بچا لے اب
ہمارے ننھے معصوموں کے جسموں کی حفاظت کر
ہمارے نوجوانوں کو ضعیفوں کو تو اپنے سایہء رحمت میں تھوڑی سی جگہ دے دے
ہمیں تیرا سہارا ہے فقط تیرا سہارا ہے
سہارا دے
نہیں تو ہم یہ سمجھیں گے
*خدا مظلوم لوگوں کا نہیں ہوتا*